तेहरान। इरानका विभिन्न प्रान्तहरूमा अमेरिकी सेनाले गरेको तीव्र हवाई आक्रमणका कारण कम्तीमा ३८ जनाको मृत्यु हुनुका साथै ४०० भन्दा बढी मानिस घाइते भएका छन्।

इरानको स्वास्थ्य मन्त्रालयका अनुसार अमेरिकी आक्रमणले पुल, ऊर्जा सुविधाहरू र समुद्री नियन्त्रण टावरसहितका महत्त्वपूर्ण नागरिक पूर्वाधारहरूलाई निशाना बनाएको छ।

इरानी सञ्चारमाध्यम प्रेस टिभीका अनुसार होर्मोजगन, बुसेहर, सिस्तान र बलूचिस्तान, खुजेस्तान तथा लोरेस्तान प्रान्तका विभिन्न प्रभावित क्षेत्रहरूमा यो बमबारी गरिएको हो। आक्रमणका क्रममा चाबहारको शाहिद कलन्तरी बन्दरगाहमा रहेको सामुद्रिक नियन्त्रण टावर पूर्ण रूपमा ध्वस्त भएको छ।

अमेरिकी सेन्ट्रल कमान्ड (सेन्टकम) ले ओमानको खाडी र होर्मुज जलमार्ग हुँदै हुने व्यापारिक ढुवानीको निगरानी गर्न इरानको इस्लामिक रिभोलुसनरी गार्ड कर्प्स (आईआरजीसी) ले प्रयोग गर्ने उक्त टावरलाई सफलतापूर्वक नष्ट गरेको पुष्टि गरेको छ। यद्यपि, बन्दरगाहको कार्गो सुविधाहरूमा भने मानवीय हताहती नभएको र सुरक्षा जाँचपछि सेवा पुनः सुरु गरिने इरानी अधिकारीहरूले बताएका छन्।

आक्रमणका कारण विभिन्न प्रान्तमा भौतिक क्षतिको विवरण सार्वजनिक भइरहेका छन्। होर्मोजगन प्रान्तको खमीर काउन्टीमा छ वटा पुलसहित धेरै स्थानमा ठुलो क्षति पुगेको छ भने बन्दर अब्बास, बन्दर खमीर र लार जोड्ने यातायात मार्ग अवरुद्ध भएको छ।

होर्मोजगनमा मात्रै सात जनाको मृत्यु र नौ जना घाइते भएको गभर्नर कार्यालयले जनाएको छ। यस्तै, बन्दर अब्बासको आवासीय क्षेत्रमा भएको आक्रमणमा एक जनाको मृत्यु भएको छ भने त्यहाँको रेलवे शाखा स्टेसनमा क्षति पुग्दा दुई जना घाइते भएका छन्।

बुसेहर प्रान्तमा पनि केही घण्टाको अन्तरालमा दुई पटक आक्रमण भएको छ। खुजेस्तान प्रान्तको अहवाज वरपरका क्षेत्रलाई लक्षित गरी गरिएको बमबारीका कारण क्यान्सर उपचारमा विशेषज्ञता प्राप्त शाहिद बाघाई अस्पताललाई अस्थायी रूपमा खाली गर्नुपरेको इरानी अधिकारीहरूको आरोप छ। पश्चिमी इरानको लोरेस्तान प्रान्तको वेसियान जिल्लामा पनि अमेरिकी विमानहरूले बम खसालेका छन्।

अमेरिकी सेनाले तटीय निगरानी प्रणाली, हवाई रक्षा स्थल, पूर्वाधार र समुद्री सम्पत्ति लगायतका सैन्य क्षमताहरूलाई लक्षित गर्दै यो कारबाही गरेको स्पष्ट पारेको छ। वासिङ्टनले आफ्नो मुख्य उद्देश्य इरानी सैन्य क्षमतालाई कमजोर पार्नु र क्षेत्रीय सुरक्षामा उत्पन्न खतराको जवाफ दिनु रहेको बताए पनि तेहरानले भने अमेरिकाले जानीजानी नागरिक पूर्वाधारलाई ध्वस्त पारेको आरोप लगाएको छ।

यसैबीच, अमेरिकी आक्रमणको विरोध गर्दै इरानले कडा जवाबी कारबाहीको घोषणा गरेको छ। इरानले बहराइन, कुवेत, सिरिया र ओमानमा रहेका अमेरिकी सैन्य ठेगानाहरूमा आफूले जवाबी आक्रमण सुरु गरिसकेको दाबी गरेपछि मध्य पूर्वमा तनाव उत्कर्षमा पुगेको छ।-डिसी नेपाल