Nov 14 2026 | २०८३, कार्तिक २९ गते
Nov 14 2026 | २०८३, कार्तिक २९ गते
काठमाडौँ २३ असोज
परराष्ट्रमन्त्री एनपी साउदले आफ्नो इजरायलका समकक्षीसँग टेलिफोन संवाद गरेका छन् । मंगलबार दुई देशका परराष्ट्रमन्त्रीबीच टेलिफोन संवाद भएको परराष्ट्र मन्त्रालयले जनाएको हो ।
संवादमा उनीहरुबीच निधन भएका नेपालीहरुको शव स्वदेश ल्याउन, नेपालीहरुलाई सुरक्षित स्थानमा स्थानान्तरण गर्न र स्वदेश फर्कन चाहने नेपालीहरुलाई सहजीकरण गर्ने विषयमा कुराकानी भएको मन्त्रालयले जारी गरेको विज्ञप्तिमा उल्लेख छ ।
सो अवसरमा मन्त्री साउदले कठिन समयमा नेपाल इजरायलको साथमा रहेको बताएका थिए । यस्तै इजरायली सरकारका परराष्ट्रमन्त्रीले पूर्ण सहयोगको प्रतिबद्धता व्यक्त गरेका छन् ।
इजरायल हमासले शनिबार गरेको आक्रमणमा १० जना नेपाली विद्यार्थीको ज्यान गएको थियो । इजरायल र गाजाको सीमा क्षेत्रमा बंकरभित्र आश्रय लिएर बसेका सुदूरपश्चिम विश्वविद्यालयका ३२ जना र कृषि तथा वन विज्ञान विश्वविद्यालयका २३ जना गरी ५५ जना विद्यार्थीहरुलाई सुरक्षित स्थानमा स्थानान्तरण गरिसकेको मन्त्रालयले जनाएको छ ।
यस्तै केही विद्यार्थीहरुलाई सुरक्षित स्थानमा सार्ने काम भइरहेको मन्त्रालयले उल्लेख गरेको छ । मन्त्रालयका अनुसार सम्पर्कविहीन अवस्थामा रहेका बिपिन जोशीको खोजीकार्य तीव्र रुपमा भइरहेको छ । यस्तै सरकारले फर्कन चाहनेलाई नेपाल ल्याउने भएको छ । रातोपाटी
© 2026 All right reserved to janachahana.com | Site By : Sobij
