Nov 14 2026 | २०८३, कार्तिक २९ गते
Nov 14 2026 | २०८३, कार्तिक २९ गते
दमौली ३१ साउन
नेपाल प्रेस युनियन तनहुँ शाखाको नवौँ जिल्ला अधिवेशन आगामी भदौ ९ गते मंगलबार दमौलीमा हुने भएको छ । नेपाल प्रेस युनियन तनहुँ शाखाको आज दमौलीमा बसेको बैठकले भदौ ९ गते अधिवेशन गर्ने निर्णय गरेको हो । अधिवेशनलाई व्यवस्थित र भव्य रूपमा सम्पन्न गर्न युनियनका पूर्व अध्यक्ष ऋषिराम पोखरेलको संयोजकत्वमा तीन सदस्यीय अधिवेशन प्रवन्ध समिति गठन गरिएको छ ।
युनियन तनहुँका उपाध्यक्ष पूर्ण विकेको अध्यक्षतामा बसेको बैठकले शाखाका अध्यक्ष स्वर्गीय गोरा मियाँको स्मरणमा मौनधारण गर्दै शोक प्रस्तावसमेत पारित गरेको छ । साथै, स्वर्गीय मियाँको योगदानको स्मरण गर्दै तनहुँमा आबद्ध एक जना क्रियाशील पत्रकारलाई यसै वर्षदेखि ‘स्व. गोरा मियाँ प्रेस युनियन पत्रकारिता पुरस्कार–२०८३’ प्रदान गर्ने निर्णय गरिएको छ ।
पुरस्कार छनोटका लागि प्रेस युनियन तनहुँका पूर्वअध्यक्ष ओमकार आचार्यको संयोजकत्वमा वर्तमान अध्यक्ष अमरराज नहर्की र प्रेस युनियन गण्डकी प्रदेश सचिव अञ्जना तिमिल्सिना सदस्य रहेको तीन सदस्यीय पुरस्कार छनोट समिति गठन गरिएको छ । बैठकले अभिव्यक्ति तथा प्रेस स्वतन्त्रताको पक्षमा सरकार उदार बन्न नसकेको भन्दै प्रेस तथा अभिव्यक्ति स्वतन्त्रताको संरक्षणका लागि सरकार गम्भीर र जिम्मेवार बन्नुपर्नेमा जोड दिएको छ ।
कार्यक्रममा प्रेस युनियन तनहुँका सचिव उपेन्द्र खनालले सञ्चालन गर्नुभएको थियो । कार्यक्रममा शाखा सहसचिव शीला वाग्ले, निवर्तमान अध्यक्ष अमरराज नहर्की, पूर्वअध्यक्ष ओमकार आचार्य, नेपाल पत्रकार महासंघ तनहुँका अध्यक्ष डिपी अधिकारीलगायतले साना तथा निजी सञ्चारमाध्यमलाई समेत वर्तमान सरकारले कुण्ठित गर्ने काम गरेको भन्दै त्यस्ता गतिविधि तत्काल रोक्नुपर्ने धारणा राख्नुभएको थियो । प्रेस युनियन तनहुँमा हाल ३९ जना पुराना र ७ जना नयाँ गरी ४६ जना पत्रकार आबद्ध रहेका छन् । अधिवेशनले शाखाको आगामी नेतृत्वसँगै पत्रकारको पेशागत हकहित, प्रेस स्वतन्त्रता र सञ्चार क्षेत्रका समसामयिक विषयमा समेत नयाँ दिशा तय गर्ने अपेक्षा गरिएको छ ।
© 2026 All right reserved to janachahana.com | Site By : Sobij
