Nov 14 2026 | २०८३, कार्तिक २९ गते
Nov 14 2026 | २०८३, कार्तिक २९ गते
काठमाडौं १४ साउन
रुसको सुदूर पूर्वी तट नजिक समुद्रमा ८ दशमलव ७ म्याग्निच्युडको शक्तिशाली भूकम्प गएको छ । भूकम्पपछि अमेरिका, जापानलगायत धेरै देशमा सुनामीको चेतावनी जारी गरिएको अन्तराष्ट्रिय समाचार संस्थाहरुले जनाएका छन् ।
अमेरिकी भूगर्भ सर्वेक्षणका अनुसार यो भूकम्प रुसको शहरबाट १३६ किलोमिटर पूर्वमा बुधबार बिहान आएको हो। त्यसपछिका परकम्पहरू पनि ६.९ र ६.३ म्याग्निच्युडका रहेका छन् । रुसको काम्चात्का क्षेत्रमा समुद्रले चार मिटरसम्मका छाल ल्याएको बताइएको छ। काम्चात्काका गभर्नर भ्लादिमिर सोलोडोभले टेलिग्राममार्फत जारी भिडियो सन्देशमा यो भूकम्प “दशकौँयताकै सबैभन्दा शक्तिशाली” रहेको बताएका छन्।
जापानले तीन मिटर उचाइसम्मका छाल आउनसक्ने चेतावनी दिएको छ। यो सन्देशपछि टोकियो नजिकैको योकोहामा लगायतका स्थानमा टेलिभिजनमार्फत आपतकालीन सन्देश प्रसारण गरिएको अलजजिराले जनाएको छ ।
अमेरिकाको होनोलुलुस्थित आपतकालीन व्यवस्थापन विभागले “ध्वंसात्मक सुनामी छालहरू” आउने प्रक्षेपण गर्दै केही तटीय क्षेत्र खाली गर्न आह्वान गरेको छ।
भर्जिनिया टेक विश्वविद्यालयका सुनामी विज्ञ रोबर्ट वीसका अनुसार यो घटनालाई गम्भीर रूपमा लिन जरुरी छ। अल जजीरालाई दिएको अन्तर्वार्तामा उनले भने, “यसपटकको घटनाबारे चिन्तित हुनु उचित नै हो।”
रुस, जापान र अमेरिकी पश्चिमी तटीय क्षेत्रका बासिन्दालाई सतर्क रहन, उच्च स्थानमा जान र आधिकारिक सूचनाको पालना गर्न सम्बन्धित निकायले आग्रह गरेका छन्। नेपाल भ्यूजबाट
© 2026 All right reserved to janachahana.com | Site By : Sobij
